亞洲各地有不少人罵美國係帝國主義，橫蠻霸道，呢樣唔啱，嗰樣唔掂，即將衰落，中國盛世來臨，習核心勝過鹹豬特多多聲啦，但又有好多人在美國買屋買地，送子女往美國留學入籍，大搞投資移民，馬雲現在全世界大名遠播，在美國買下幾百畝嘅園地，唔通會冇一兩個美國戶口？
咁多世界青年才俊願意留在美國，原因之一係美國自由民主，有其吸引點，原因之二（對專才而言）就係回國困難，索性留美。見到泰國A嘅二千金，左丁山就諗起，呢位新晉醫生F有回港、回泰嘅資格，但因為醫生保護主義，回來不易，佢咪索性留在紐約曼赫頓嘅著名醫院工作囉，醫生F先讀Pre Med四年，再讀醫（好似6年），然後做實習，前後十一、二年先至升格為正式醫生，用咗父親泰國A唔知幾多錢培養佢，咁就白白為美國人服務，你話美國幾着數呢──亞洲人用幾多資源為美國培養專才呀！
中國與美國競爭，全靠本國人才本國培養。美國就有全世界人才自願留美，源源不絕，而且未必駛動用美國納稅人嘅錢㖭，邊個着數啲，你諗嘞。
特朗普上台，話限制移民，本土優先喎，係笨蛋先至會講得出。泰國A大女婿係數學博士，本是一間大學助理教授，一般助理教授薪酬一般，但被對沖基金招攬為分析師後，身價急升，今次來港，與大女N用公費住在中環文華東方酒店，大女N猛讚呢間酒店好到冇得頂，幾識貨。二女醫生F呢？用自己錢噃，與丈夫住在太子一家普通酒店（左丁山未聽過），係在網上搵到嘅平價酒店，醫生F話：「下次回港，希望住好啲！」哈哈，捱多幾年成為大醫生先啦，或轉行做對沖基金。諗起特朗普上台，就問吓博士C：「點解華爾街錯得咁緊要，大選前就驚特朗普，大選後就全面擁抱，升完又升，你地分析師搞邊科？」博士C成晚只係食，好喜愛馬會中菜，靚過華爾街附近嘅唐人街多多聲吖嘛。一講特朗普，佢就認錯：「我所識嘅所有人，白人黑人亞洲人，基金經理，經紀，銀行家，男男女女冇一個投票俾特朗普，以為呢啲就係民意，誰知呢個男人贏咗，個個又驚蝕底，猛咁追貨，我地係完全睇錯晒嘅，買股票要跟風以免跑輸大市，冇法子唔追購股票。」美國東西兩岸知識精英今次俾中西、中南部城鎮居民農民打咗一棍，打得好應，一時消化唔嚟，下意識上街示威洩憤，應不成氣候，不致演變成泰國黃衫軍嘅，但因此發起加州獨立運動，以後有好戲睇。