富昌金融老闆郭俊偉係典型潮州人，不過就冇同鄉詹培忠咁扯火。噚日佢帶埋孻仔郭曉澤（Danny）出席傳媒午宴，Danny全程都跟實爸爸，見爸爸同記者傾緊偈，雙手垂低企定定，粒聲唔出，非常有規矩。
Danny喺英國Sussex大學讀犯罪學，畢業就加入公司做主席助理，跟住爸爸學嘢已經幾個月。Danny甚為怕醜，好細聲咁話自己個個部門都要去學習，暫時乜都要做。
郭俊偉應該對呢個老么好滿意，佢話仔女讀咩書，各憑自己興趣，做老豆嘅唔會理咁多，「反正做生意嘅話，讀咩都冇所謂」。郭老闆自己年輕時仲浪漫，本來諗住做詩人㖭！最後入了商業世界，就冇咁好閒情逸致去唸詩詞歌賦了。
郭老闆仲同場加映，醒各位一個減肥貼士，就係每餐只食蒸魚、一羹鹽灼菜心，一開始係好辛苦，深夜會肚餓到手震，可以食兩塊鹹餅乾「呃吓個肚」，但只要堅持下去，加埋適量運動，三個月可以減到6至10公斤！郭老闆就應該唔係貪靚，但怕自己年紀漸長，健康唔好，所以的起心肝減肥，繼續陪太太周遊列國，例如上個聖誕就去咗韓國，貪聖誕就係要凍先好。