英格蘭隊長朗尼上星期六晚飲到啤啤夫，醉貓相仲俾英國《太陽報》登晒出嚟。朗尼知道大鑊，公開道歉，仲話已經同國家隊領隊修夫基耍冧，但據報曼聯領隊摩連奴就「怪獸家長」上身護短，唔單止冇鬧朗尼，反而怪英足總唔好好睇實呢位紅魔鋒將。
英格蘭上星期五喺世盃外贏咗蘇格蘭，上周六就畀班國腳放假，朗尼嗰晚同足總職員一齊飲酒，之後仲走去人哋嘅結婚派對繼續飲。最大鑊嘅係，英媒攞到朗尼飲到醉醺醺嘅相，仲登晒上報紙，全世界都見到堂堂英格蘭隊長喺國際賽期間變成醉貓咁樣。英足總發聲明話：「喺任何時候，所有國腳都有責任保持行為檢點。我哋將會修訂國腳喺國際賽期休息日入面嘅行為指引。」
10國腳蒲到四點
足總出到聲，朗尼都知衰，佢嘅代表話：「雖然嗰晚係假期，但朗尼都認同呢啲行為唔符合佢喺代表隊嘅身份。朗尼已經私人向修夫基同足總技術總監艾斯禾夫道歉，佢仲想向所有睇過呢啲相嘅年輕球迷講對唔住。」
估唔到曼聯領隊摩連奴呢次就力撐朗尼，英國《天空體育》收到風，摩帥好嬲，但唔係嬲朗尼而係嬲英足總；摩帥認為同朗尼飲酒嗰班足總職員應該制止朗尼再飲落去。摩佬呀，朗尼成31歲人㗎嘞。除咗朗尼唔自律抵鬧之外，英格蘭暫代主帥修夫基似乎冇乜威嚴，鎮唔住班星，因為據報同一晚，有10名英格蘭國腳都走咗去夜總會玩，玩到深夜四點半先走人。有傳英足總諗住同修夫基簽四年長約，真係要考慮清楚啲先好。
曼聯殘陣迎阿仙奴
嚟緊周六曼聯會喺英超鬥阿仙奴，《太陽報》話朗尼嘅傷冇大礙，但英國《每日鏡報》就話佢會缺陣，我求大俠都唔知信邊份嘞，但可以肯定嘅係伊巴謙莫域停賽，路爾斯華倫西亞同艾歷拜利都養緊傷。費蘭尼、基斯史摩寧同埋勞基梳爾就上陣成疑。阿仙奴方面，辛迪卡索拉未出得，但阿歷斯山齊士應該冇大礙。