1996年成立嘅平機會轉眼間成立20年，噚日搞慶祝會，4位前主席難得同場現身。現任主席陳章明致辭時多謝各界對平機會嘅十卜，感激喺平權路上結伴同行，佢表明會繼續努力推動平等機會主流化，力促強化法律框架，令平等機會概念融入機構嘅政策同議程中。
到場嘅首任主席張妙清讚揚平機會發展至今，已成為香港社會日趨公平公正嘅基本體制，社會大眾視平機會為反歧視嘅旗手，唔單止執行現有嘅反歧視法例，亦為社會普遍平等機會議題發聲。
王見秋周一嶽冇現身
第二任主席、曾經就中一派位制度控告政府嘅胡紅玉都好認同，佢話任何人都唔應該受到歧視，唔應該啞忍之時更加要討回公道。另外兩位前主席朱楊珀瑜同鄧爾邦都有現身，但未見王見秋同周一嶽呢兩位前揸fit人。