早排警隊公佈新一輪人事調動，警察公共關係科（PPRB）一哥區展秋下周一調去做元朗警區指揮官，而原本嘅指揮官霍樂生就會接棒成為PPRB一哥，霍Sir噚日首度同傳媒「摸吓底」，互相了解吓。新官上任仲有新猷，警隊宣佈正式開咗Instagram，知道年輕人同女性多用ig，希望吸納佢哋多啲留意警隊資訊。
情報高手最叻查毒品
呢位霍Sir原來係警隊情報高手，當差28年，接近一半時間係喺刑事情報科工作，主要負責毒品調查科。做得情報收集一定好口密，所以霍Sir同八方講，好多難忘案件都係不能說的秘密，不過佢都分享咗一單難忘案，就係1998年偵破160公斤嘅冰毒案，係當時有紀錄以嚟最大宗嘅冰毒案，仲成功拘捕集團主腦，令佢印象深刻。霍Sir上年8月調去元朗區做指揮官，致力打擊青少年罪行同埋爆竊案等，令區內罪案率即刻跌至15年新低，佢話其實元朗好太平喎。
唔講唔知，原本霍Sir係運動發燒友，海陸空樣樣掂，除咗風帆、潛水，佢亦年年跑馬拉松，由2004年更開始挑戰全馬。唔單止，佢仲考埋小型飛機駕駛執照，衝上雲霄。
而警隊嘅ig account，頭炮放咗一啲警隊嘅攝影比賽相片，據知希望日日有相upload，都係宣傳吓警隊有幾好嗰種啦。唔知一向撐警嘅李私煙，會唔會成為警隊ig嘅頭號粉絲？
李八方
mailto:[email protected]