冬季又嚟啦，政府每年都呼籲公立醫院醫護人員打流感針，八方噚日喺fb就睇到一條叫人打針嘅片，背景疑似係青山醫院，一男一女（圖）着住醫護人員制服戴住黑超，一邊扭動身體，一邊兩手揈揈唱早前紅爆嘅「PPAP」改版：「I have a vaccine（疫苗）, I got injected......I got my health，they got protected」，仲要學原片中PIKO太郎咁「啊」一聲。
短片引嚟唔少人留言，有人話「X到唔敢睇」，又有人話「青山走失病人」。八方問過青山醫院，醫院話條片係護理部同事自發製作；醫護人員希望用創意手法鼓勵同事打針，只會喺內部播放。查實呢兩位醫護人員要嘉許喎，多啲醫護人員打針可以保障病人嘛。