萬科股權戰自從阿爺介入後，沉寂咗好一陣子。直到有「債王」之稱嘅中國恒大（3333）以近200億銀掃貨後又熱鬧番。但戰局又多一位成員啦，因為《明報》係中央登記查到，前「恒生大班」柯清輝做主席嘅中策（235）旗下證券行中策富匯由月初起陸續增持萬科H股至2.57%，已值大嗱嗱7億銀！
呢位前大班一向好雜食，好多炒股都有佢身影，就連由基金愛股變「墮落天使」的思捷（330）都傳過在公司公佈數據前偷步增持，傳畀財務匯報局調查，最終要公司澄清先告一段落。
今次明報話柯生同「大Dee會」偶有合作，係人都知「大Dee會」牌腳恒大主席許家印在萬科股權戰舉足輕重，狂掃A股，今次中策狂掃萬科H，好難令人唔諗兩者係咪裏應外合囉。
但柯清輝一向係「狠角色」，一句以客戶私隱為就耍走大家啦。不過萬科𠵱家股東班底已經越來越雜，既有鄭裕彤家族「御用經紀」鼎珮證券，仲有傳是中渝（1224）主席張松橋旗下的Nexus Capital，好戲又點會咁快落幕。
計華華話，花生期貨價格一定急升，大家入定貨啦！