幾支英超勁旅陣中都有啲南美兵，為咗可以令球員減少國際賽後嘅舟車勞頓，所以曼城、利物浦同埋法甲嘅巴黎聖日耳門（PSG）夾份包機送佢哋嘅巴西國腳返嚟歐洲，但周六大戰曼聯嘅阿仙奴同埋車路士就冇咁做。
雖然阿歷斯山齊士喺智利國家隊傷傷地，但阿仙奴都冇派包機特登送佢返倫敦，叫佢同哥倫比亞嘅奧斯賓拿搭普通民航機返英國，佢兩位禮拜四先返到嚟。英國《每日郵報》引述阿仙奴內部消息話，兵工廠唔係為慳錢，而係「有啲球員鍾意坐商業航班多過私人機，佢哋話空間多啲喎。」我求大俠就未搭過私人飛機，或者要搵人請我搭吓，先知阿仙奴呢個講法係咪藉口嘞。至於曼聯就冇呢個麻煩，呢輪係得羅美路要返南美，但佢係後備門將，反正禮拜六都係坐冷板，唔使特登包機啦！
曼城紅軍PSG夾錢包機
喺包機呢方面，曼城就做得最足，佢哋同利物浦、PSG夾埋用12萬鎊（約116萬港元）租咗架機，將費蘭甸奴、堤亞高施華同菲臘比古天奴等巴西國腳一齊接晒返歐洲，禮拜三就到埗，比唔包機快一日。曼城仲包機將阿古路、奧達文迪等阿根廷國腳送返曼市。據報，車路士其實有錢包機，但球會覺得佢哋下周日（20日）先對米杜士堡，所以唔使咁趕。