希拉莉大熱倒灶，做唔到美國首位女總統，世界唔少頂尖女政治家都麻煩多多，德國總統默克爾，九月州議會大敗，默克爾嘅難民政策失敗，亦都催化右翼排外政黨出嚟，德國就有個叫「另類選擇黨」（AfD）冒起，九月選舉仲拎到差唔多15%選票，佢哋嘅主張就係反移民和反伊斯蘭，下年聯邦議會大選睇吓搞唔搞到默克爾落台。
奧巴馬、默克爾呢啲所謂「左膠」政客，開口埋口講大愛、共融，但現實又邊有咁多包容；德甲異軍RB萊比錫（圖）就係好例子，大家都集中佢哋獲大型健康飲品商注資，09年收購後猶如坐住直昇機由第五級聯賽至今季首次升上德甲，開季至今仍保不敗，同拜仁同分，僅以得失球差排第二。
RB萊比錫除咗有錢，另一個焦點就係來自德國東部，萊比錫昔日仲係前東德第二大城市，RB萊比錫過去都有唔少生於前東德地區球員效力，不過升班後都盡力洗底，一線球員中得番中場伊迪沙托尼生於前東德地區，正、副隊長杜米歷凱薩及韋利柯賓都係生於德國西部城市㖭。RB萊比錫過去作客，特別係西部城市往往遇上主隊球迷惡意對待，每位RB萊比錫球員開季前都要接受兩個鐘嘅培訓課程，以應對帶民族主義嘅敵對球迷。
文：牽牛