恒指先升後跌，航運股完全跟唔到歐美航運股大漲嘅強勢，連宏利（945）都腳軟，強勢板塊都炒唔起就反映市場有下跌壓力，上期已經講過有可能下試2萬點，對於市況睇法，暫時無新補充。
人民幣貶值，從海外入口產品至內地銷售嘅企業自然蝕滙水，至於出口產品至海外嘅公司，又受到特朗普提倡保護主義所拖累，加息又對資產股產生負面影響，餘下只有內需概念影響比較中性。中資股，前景唔好嘅周街都係。
好股自然要珍惜，康哲藥業（867）主要從事藥品分銷，主要從外國引入藥品，再向內地醫院銷售。近年外國藥企願意將成熟產品向內地藥企出售，令康哲藥業更容易提升藥品組合，雖然係從海外進口藥品，但唔怕蝕滙水，因為向醫院銷售高端藥品，議價能力甚強，產品加價冇難度，相信容易將人民幣轉弱因素轉嫁至醫院客戶，毛利率由舊年上半年57.2%，升至今年上半年58.3%，不跌反升，可見一班，盈利增長可測性咁高，近年少見。
康哲今年上半年純利增長32.5%，過去5年盈利年複合增長率25%，而2015年表現較差，但盈利實際增長仍有20.4%。年度化2016年市盈率22.3倍，以康哲長遠盈利年增長至少維持兩成計，真係唔貴，買嚟長揸絕對值，係醫藥概念首選。
晉佳
http://fb.com/advanceguy1