曾幾何時，何良有過谷草王美譽，當年佢曾經係谷戰贏馬最多練馬師，同方嘉柏齊名。今季何良馬房中興，這晚谷草一開場又贏，於頭場五班1200米由柏寶勝出「大地和平」，此駒8.7倍建功，取得轉投何廐後首捷，組合獨贏A2派28.5元。
何良已經連續七次賽事贏馬冇斷纜，氣勢之盛一時無兩，以往何良只試過98-99年馬季初六連勝，相隔18年後終於寫下個人新紀錄七連勝。可惜的是何良這晚不在港，反而由退休練馬師梁定華主持大局。
何廐一連七個賽日贏馬共取七Win，馬房唔貪心，體現童子軍精神日行一善，今季累積已有11場頭馬，仲差四場就可以畢業合乎續牌最低要求。至於「大地和平」上季尾由霍利時轉至何廐，對上兩次都在排位後因健康理由退出，今場係本身第三次代表何廐參賽，結果沿途居中前位置，由新配搭柏寶後上一攻而破，輕取亞軍「皇帝誥令」個幾馬位。
「皇帝誥令」服役首次上名以大冷門身份入Q，三、四名分別為雷神座騎「樂趣」及大熱門「勁駿皇駒」，四重彩派10萬幾。