上星期五11月11日正值光棍節，中國跨國企業阿里巴巴就話旗下網購品牌淘寶、天貓等，單日已經做咗一千億人民幣生意，不過財大氣粗都未必贏晒全世界，之前盛傳阿里巴巴將成為巴塞隆拿未來四年胸口贊助，周三巴塞開記者會揭曉，結果同樣由網購店日本樂天贏出，唔知又會唔會傷透中國玻璃心。
20億贊助巴塞四季
西甲冠軍巴塞隆拿同原本嘅卡塔爾航空約滿，唔少大企業都爭住贊助呢支地上最強，據報樂天出到近雙倍贊助費，由卡塔爾航空3,000萬（約2.46億港元）一年，加碼到6,000萬歐元（約4.9億港元）一年，由17/18球季開始贊助四季，力壓雪佛蘭贊助曼聯，成全球球會最高胸口贊助。卡塔爾航空可能退而求其次，喺巴塞練習球衣賣廣告。
講開巴塞，當家球星美斯星期二就救番阿根廷，阿國世界盃外圍賽出線陷危機，美斯懶理賽前搭飛機嘔到七彩，主場對哥倫比亞，就交出一個入波兩個助攻，協助阿國大勝3:0，一分反壓哥倫比亞升番上第五位，賽後佢仲帶埋全隊球員向阿國傳媒開火㖭。
美斯「領軍」封殺阿傳媒
賽後以美斯為首嘅26位阿根廷球員就神色凝重咁開記者會，事緣阿國一個電台節目Super Mitre Deportivo爆料，話阿根廷翼鋒拿維斯，代表國家隊期間食大麻，而且唔止一次，搞到國家隊唔用佢。拿維斯收到風就梗係發晒火，話明要告呢間電台，美斯等隊友就企同一陣線，喺記者會宣讀聲明，全隊杯葛阿國傳媒，將會拒絕受訪。
同日巴西就繼續遇神殺神，作客秘魯由加比爾捷西斯同連拿度奧古士圖各建一功，以2:0贏波，27分繼續排榜首。