睇韓星跳舞就睇得多，南韓籃球員跳又睇過未？首次嚟香港參賽嘅南韓安養高中，口尋晚就喺修頓舉行嘅C2 SPORTS籃球邀請賽壓軸賽開始前，喺在場近千名球迷面前跳舞，睇到女球迷勁興奮。
韓風確實存在一股魅力，安養一班高中生除咗跳舞外，仲喺半場休息表演入樽，吸引勁多歡呼聲。最後佢哋亦喺尾場，展示出超高速嘅快攻。不過南青喺下半場反超前，安養最後追到只落後一分，可惜最後都以64:65不敵南青。
至於以甲二球員為骨幹嘅C2 SPORTS，就喺頭場對連續兩年參賽嘅台灣泰山高中。C2 SPORTS開段憑較出色嘅防守同控制籃板，首節就領先22:17。不過站穩陣腳嘅泰山喺完半場前打出一段7:0嘅攻勢反先41:35。加強咗內線防守嘅泰山，喺第三節一度拉開16分；而C2 SPORTS雖然喺第四節有陳家榮憑多次快攻轟入八分，但速度同機動性都較高嘅泰山，憑有五位得分球員上雙，最後以84:63擊敗C2 SPORTS。