特首梁振英話過今年9月完結前交代選唔選特首，但到𠵱家都未有聲氣，而5年前嘅今日CY就出聲明，話會喺月底宣佈參選。特別之處係當日佢冇公開活動，對手唐英年就同傳媒茶敍。就喺茶敍去到一半之時，現場所有記者都收到CY發言人通知，搞到唐唐喺茶敍期間，即時俾記者當面質：幾時參選先？
同日呢，有傳媒刊登梁振英專訪，CY喺訪問中力挺自己並無生意失敗，事關之前已經傳佢因為戴德梁行喺英國嘅股價插水，身家勁縮3億。佢仲強調自己喺戴德梁行有出糧、花紅、股息同袍金等，甚至話「我夠膽講自己係炙手可熱嘅，經常有獵頭公司打電話畀我」。由此可見，就算CY唔係醒目仔，都係機關算盡啩，唔知大家又點睇？