中環食晏冇四、五十蚊都走唔甩，不過蘭桂坊一號地下今日起竟然賣32蚊飯盒，仲賣足一個月！邊位咁好？之唔係深水埗明哥囉！佢何止造福中環人，第時元朗、黃大仙、觀塘人都可能受惠，事關佢打算去呢3區開慈善飯堂，將免費派飯活動伸延開去。
之前提過，明哥喺蘭桂坊開為期一個月嘅慈善義賣限定店，每日3款餸任揀，今日暫定供應300個，之後再調整。不過限定店都只係小試牛刀，明哥終極夢想係去其他區開恒常慈善飯堂，首選元朗、黃大仙、觀塘，因為元朗有好多南亞裔基層同難民，而觀塘黃大仙就比較多貧窮老人。
透露有財團接觸
不過啲錢邊度嚟？明哥話𠵱家有幾個財團同佢接觸，佢仲話唔想飯堂好似時下好多社企咁，「使完基金嘅錢就結業，（社會企業）變咗使錢企業」，佢話飯堂一定會自負盈虧喎。
飯堂未開，試住限定店嘅撚手小菜先，今次有明哥拿手嘅乾炒牛河、「男人的浪漫」豆腐火腩飯、梅菜扣肉飯等等，如果用Android Pay畀錢，系統會同時捐4蚊畀義賣活動，買飯仲可以加多一蚊換飲品。
飯盒有茶餐廳級數，明哥拍心口保證中環人都會食得慣。如果你買唔切飯盒又想做吓善事，全線7-11同網上外賣服務Deliveroo都有慈善飯票買，每張24蚊。明哥希望呢個月籌夠4萬張飯票支持下年開支，所有飯盒同飯票扣除成本收益撥捐「北河（明哥）慈善基金」。
李八方
mailto:[email protected]
