立法會噚日辯論由民建聯張國鈞提出、將初中中史獨立成科及列為必修科嘅無約束力動議。本身係飛機師嘅公民黨譚文豪發言話，本身唔反對中史獨立成科，不過對以吳克儉為首嘅教育局、以梁特馬首是「膽」嘅教育施政，非常冇信心，怕變國教翻版。
譚文豪（圖）發言時似乎冇為意讀錯字，即係將馬首是瞻（音尖）讀咗做馬首是「膽」，而之後發言嘅民建聯劉國勳笑笑口指正，仲趁機話讀中史有助學修辭同成語典故咁話。八方問過飛機師，佢話本身識得馬首是瞻，但可能太緊張嘞，加上冇為意先至讀錯。至於被網民取笑係「新樹根」……佢就笑住話「要向佢（Tree根）學習」喎。
真‧文豪之後拍片自嘲，佢話唔好意思，一時口誤講錯成語。「以後一定卧薪嘗膽，熟讀成語」。