所謂有心唔怕遲、十月都係拜年時，好似蔡約翰麾下四歲新西蘭自購新馬「翩翩」咁，上次10月26日勝出後，因閘廂問題食詐糊，賽事宣佈無效，這晚谷草此駒於第二場四班1000米夥拍潘頓捲土重來，結果初跑谷草以壓倒性姿態後上開齋，單Win及組合獨贏A1同派16.5元。
「翩翩」上季出道兩戰田草都做二奶，今季改於谷草起步捨難取易，上次10月26日本已輕勝四班1000米，惟同場因閘廂失靈，各駒閘廂打開時間不一，造成不公平，結果馬會將整場賽事作廢當冇跑過，搞到「翩翩」台前幕後中空寶，空歡喜一場！
事隔三星期，「翩翩」這晚再由潘頓出戰同班同程，一直係一面倒大熱。陣上潘頓一路留住跑胸有成竹，直路抄出大外叠追趕，唔怕蝕位但求望空唔好塞車，「翩翩」喺佢齋推冇開鞭之下，拉士百幾米開行摩打，冚過一度於內欄突圍的雷神座騎「綠茵風采」勝出，雖只小勝頸位，但其實收韁過終點大把在手，同時造就蔡約翰連續第四個賽日贏馬。「綠茵風采」力拼做阿二；三、四名分別為「問鼎高峰」及「花紅」，四重彩派一萬蚊多啲。
「翩翩」馬主黃言信表示，這場頭馬似跌咗又執番，當然開心。其實上次發生閘廂問題後，他已立即向馬會反映，建議一周後重賽，可惜不被馬會接納。黃言信表示上次取消賽事沒有問題，但為何不在一周後重賽，這是他唯一意見。他又表示今仗賽前對馬兒有信心 但贏得很驚險，可能反映愛駒不算太叻，升上三班要睇形勢。