蔡約翰即是蔡約翰，八屆冠軍練馬師這晚一發威唔係人咁品，佢先於第二場勝出「翩翩」，第三場再贏「威風霸皇」包辦第二口孖寶，第四場冇馬出隔一隔，到第五場四班1650米再嚟料，憑雷神莫雷拉座騎「勁豐裕」再下一城，向來沙田為主場的蔡廐，罕有地在「客場」快活谷夜馬中三元，全面開出「客勝」。
「勁豐裕」之前季內四戰俱近而未勝，這晚跑到第五次終於重響勝鼓，沿途守第七位，直路一衝過晒贏頸位，單Win及組合獨贏A1分別派41.5及26元。亦是「勁豐裕」上季至今第四Win。
這晚三匹蔡廐頭馬由三位唔同騎師勝出，分別為「翩翩」潘頓、「威風霸皇」羅理雅及「勁豐裕」莫雷拉，三駒同樣都係直路從外叠後追一攻而破。當中「勁豐裕」為雷神帶來今季第40場頭馬，呢個數目剛好係於騎師榜最接近雷神而排第二的潘頓20Win之一倍，開季只有短短兩個幾月，雷神不愧為馬壇贏馬機器。
第五場四班一哩只有10駒落場比賽，順序跑獲二至四名的是「紫電明珠」、「想贏就贏」及「信是有緣」，四重彩派5,685元。