有啲嘢走咗就冇得返轉頭，就算畀你返番去，都會發覺一切唔同晒。紐尼沙軒、香川真司同馬里奧葛斯（中）都曾經喺多蒙特呼風喚雨，但出走回歸後，都由天之驕子變成閒人，好多後生仔等上位，搞到呢班回流兵企都冇位企。
由拜仁慕尼黑回歸嘅馬里奧葛斯，今季德甲得五次正選，加埋只上陣392分鐘，未有入波同助攻。香川今季德甲更只得三次正選同三次後備。四年前葛斯加埋香川真司一齊踢攻中，喺多蒙特踢出水銀瀉地嘅攻勢。佢哋一個24歲，另一個27歲，明明係大勇之年，就一齊坐冷板，真係幾唏噓。但講慘，真係唔夠28歲嘅紐尼沙軒，今季冇踢過等被賣走。據報，多蒙特諗住搵佢做籌碼去慕遜加柏買達侯特返嚟。
多蒙特前場嘅年輕化非常犀利，特別係攻中位，家陣三個當紅炸子雞都唔夠20歲，分別係基斯甸普列錫、奧士文尼迪比利同埋安利摩亞；拍埋佢哋度，香川同葛斯即刻感覺變咗做老將。19歲嘅迪比利最獲重用，今季踢過10場聯賽，仲多過奧巴美揚，佢亦貨交入兩球加隊中最多嘅四次助攻。18歲嘅普列錫一樣有四次聯賽助攻，呢位美國小將喺德甲只上陣八場，但同樣係兩入波四助攻，後生可畏！
文：咖喱