【本報訊】一名離職小巴司機昨凌晨在小西灣站頭偷駕走舊公司小巴，3小時內在中西環一帶兜客搵食，做了百多元生意後折返站頭泊車，原以為神不知、鬼不覺，未料站長等人早已在場埋伏，偷車賊當場斷正，他苦苦求饒「畀個機會」，惟站長秉公辦理報警求助，警員到場拘捕涉偷車男子。
記者：李家傑 翁鈺輝
被捕男子姓楊（34歲），友儕叫他阿東，據悉有人有偷竊及詐騙案底。據了解，阿東年前曾任47M路線（行走小西灣至柴灣港鐵站）專線小巴司機，但做了5日便辭職，該路線司機一更約460元，阿東稱搵到另一條行走荃灣路線的工作，一更收入有800元。但有司機透露，阿東是於上班期間偷駕小巴接載女朋友而被辭退。
昨凌晨零時許，夜更司機將兩部47M專線小巴泊在小西灣道瑞龍樓對開站頭，一行人稍後在附近消夜，至凌晨近一時，眾人返回站頭發現其中一輛小巴不翼而飛，遂通知行家留意，車主更駕車尋找，其間有行家指在西灣河見到失蹤小巴行走，但眾人趕至又不見蹤影。
向站長求饒「畀個機會」
姓黎站長及部份司機心有不忿，決定在站頭等候。至凌晨3時許，果見有人駕駛失蹤小巴返站頭，眾人即上前查問，站長頂着車廂、其他人則攔住司機位車門兼伸手拔去車匙，阿東當場斷正，更被揭發是舊夥計，他被困車廂內，不斷求饒「我之前揸開，冇揸一排，想操番架車，畀個機會吖！」站長喝道：「之前還之前，你𠵱家唔係我哋夥計吖嘛。你唔好走呀！」
站長態度強硬：「你都話以前揸開，你離咗職，你有乜理由攞我架車出嚟揸，你冇得對唔住，我老闆要追究要報警！」阿東則不斷求饒：「唔好搞咁大件事，大家夥計，部車交番畀你，唔好意思，我以後唔敢！」惟站長未有理會，斥責道：「如果你喺出面撞死人，撞咗車，咁我點算？我搵邊個嚟追究？你又唔係我公司員工！你不問自取，咪當你偷車囉！」阿東只好呆坐車內，警員接報到場，經調查後將涉嫌偷車的阿東拘捕帶署。
中西環一帶出沒
據悉，阿東偷車後將綠巴當紅巴行駛，其間封了錢箱及報稱八達通壞了，只收現金，在中環、西環一帶兜客，3小時內做了百多元生意。
一向駕駛該小巴的早更姓黃司機稱，車鎖有損毀，所以無上鎖，他記得阿東年前曾上班5日，他曾為阿東操車，發覺阿東駕駛態度好急，「快得嚟唔定」，黃表示稍後公司會為小巴換鎖，免再被偷走。