嗱，唔好話我求大俠係港產爛片王，其實唔少港產片都好有啟發性，好似《98古惑仔之龍爭虎鬥》咁，十三妹就用美人計，令東星何勇拳賽前同鬼妹過夜，體力透支下爆冷輸俾大頭仔，十三妹仲有金句：「How many鑊did you扑him last night?」
美斯羅拔仔都要聽話
性行為對運動員真係影響好大，所以唔單止游小姐關心，連曼城領隊哥迪奧拿，都好關心球員嘅性生活。外借至西維爾嘅拿斯尼就喺電視節目大爆，哥帥唔准球員午夜後做床上運動。拿斯尼已經同法國國家隊反晒面，國際賽期間好得閒，就接受法國《隊報》訪問爆吓料。最花生就係大爆哥帥對球員性生活嘅管束，拿斯尼話：「有一次放假前夕，哥帥就同一大班球員講，做愛係可以，但一定要午夜之前完事，因為咁樣先可以有充足嘅睡眠。」哥帥仲話之前教巴塞同拜仁，一樣有呢個禁令，連美斯、羅拔利雲度夫斯基都要遵守，美斯聽佢吩咐之後，連大腿傷都減少好多㖭。
運動科學呢啲嘢，我求大俠就唔多熟，午夜後做愛會唔會易傷啲，真係要問問醫生或者物理治療師。不過我求大俠就比較關心哥帥呢個禁令點執行，事關呢啲嘢都係私事，斷估唔係公開啩！除咗哥帥可以喺球員間屋度裝偷拍鏡頭或者偷聽器之外，真係唔知佢點知班球員幾時做呢啲嘢呢？
拿斯尼超磅激嬲哥帥
拿斯尼今季初已經不受哥帥重用，被外借至西甲西維爾。拿斯尼又自爆，因為開操初期比標準重咗四公斤，所以激嬲哥帥，唔俾佢跟大隊練波。雖然29歲嘅拿斯尼最後都成功減番磅，但覺得喺曼城都好難有正選，所以決定離開曼城。其實拿斯尼都唔係一面倒彈哥迪奧拿，佢都讚哥帥賽前做好多功課，包括製作好多短片俾球員參考，要球員充份了解佢控球在腳兼壓迫戰術，絕對係一個嚴謹嘅領隊。