選特首，有票，你要唔要？特首選委提名期星期一（14日）完結，金融服務界選委有18席，參選人當中有個非常搶眼嘅名字，就係高銀系主席潘蘇通。
潘生除咗係馬主、名下有兩隻成日chok嘅股票，同埋喜歡親近明星之外，其實佢仲有高銀證券，打埋算盤都係證券行老闆，符合資格做金融服務界選委。
問過一眾活躍行家，多數都話聽過潘生大名，但冇見過真人。咁點解佢會有興趣選特首？佢政綱係乜？當選之後諗住有乜搞作？真係要等潘生去拜會選民先會收到風。
另外，仲有三位老行尊，都係趕尾班車、最後一日先報名做選委。例如證券及期貨從業員工會會長林德明，4年前曾經參選立法會金融服務界議席，當時佢政綱包括反對被兩個監管機構管、爭取恢復最低佣金制等等。
至於余維強，曾經係聯交所理事，做證券業30幾年，同港交所（388）前行政總裁周文耀係老友，不過佢作風幾低調，後生一輩未必識得余翁。
另外，證券學會理事史理生（Reason），噚日仲講笑話「就係怕人唔記得我，所以一定要出嚟選」，係開會時臨時決定要出選。Reason話自己自由身，除咗證券學會之外，仲會去拜會其他友會，交流理念。
同幾個選委傾偈，個個都話33名候選人，比想像中少，「有啲人話選又唔選，有啲就臨時退出」。金融服務界畀人嘅印象就係愛國愛港，唔知有冇人夠guts大唱「ABC」呢？