與三藩市投資A在L' Hotel傾咗約一小時，匆匆而別，趕去中文大學開會。上個星期本來以為冇乜約會「好他條」，誰知三藩市投資A來了香港，跟住坐地鐵途中又收到泰國A來短訊：「女兒女婿到了香港，我們星期五晚到港，星期六飲茶如何？」乜時間咁啱呀，星期六跑馬有樂聲盃，點得閒陪佢飲午茶，一於推佢，老友記都係咁話；但泰國A堅持要左丁山見吓佢兩位女婿，於是唯有約在賽馬後在凱旋廳食晚飯。
呢日賽馬應贏變輸，莫雷拉全日五W三Q一P，跑十場只輸一場不入位置，就係第六場隻大熱門8號「南方快車」，呢場左丁山老早有隻心水馬，就係2號「嘉應小子」，本應買2號餐，但睇見莫雷拉在頭五場全入前3咯，氣勢如虹，於是為咗慳本，改為2、8雙膽食餐，誰知8號大熱倒灶跑第9，而2號順利勝出，爆出大冷腳，派彩和味，自己當堂血壓上升，之後莫雷拉又場場殺入三甲，但左丁山已失去運氣，輸到面黑黑。
吃飯時，飯都冇胃口入肚，只係吃餸。泰國A兩個女婿都係美國人，大女N與女婿都係博士，二女F則係醫生，今年七月做完實習，入咗曼赫頓最出名嘅長老會Presbyterian Hospital醫院做兒科產科醫生，兼在康奈爾大學嘅Weill Cornell Medical College任臨床助教，丈夫就係一間專為網上遊戲服務嘅IT公司電腦專家。Weill就係Sandy Weill啦，三藩市投資A，泰國A與左丁山同在Shearson工作時嘅主席，後收購花旗銀行，曾權傾一時；佢自康奈爾大學畢業，生前捐咗一億美元俾母校，於是康奈爾嘅醫學院就以他為名，情況與香港大學李嘉誠醫學院相同。
泰國A兩位寶貝女留學美國時，泰國A為她倆交學費，真係捱到金睛火眼，依家兩女皆有所成，自然笑逐顏開。左丁山問二女F：「你有無諗過返香港或泰國行醫呀？」二女F離港二十幾年，估唔到仲係可以講流利廣東話，佢話：「Uncle，香港與泰國都保護本地醫生，外國畢業好難返泰國執業㗎，香港情況你知得多過我啦！」哦，咁就註定一世做美國人醫生，但醒起泰國康民醫院有不少講美式英語醫生噃？二女F話：「嗰啲係國際醫院，不受限制，但啲國際醫生不能出外執業！」為咗發展泰國醫療旅遊，特准「國際性」醫院輸入外地醫生，香港其實可以抄呢個政策，准私家醫院輸入有限制執業條件嘅外國畢業醫生，起碼可以紓緩私家醫院向公立醫院挖角潮。