點解次次去旅行前先嚟病？一個籌備已久、勞心勞力的旅程，卻因出門前突然頭暈身㷫，令外遊大計被打亂，情況與有些學生每逢考試便肚痛，或有上班族每逢返新工就肚屙相似。精神科醫生指出，「旅行前就病」或與焦慮情緒有關，未必是「詐病」，因為部份人遇到壓力時會影響交感神經系統及壓力荷爾蒙，令身體產生心跳加速、手震、氣喘、尿頻或肚屙等不適，需要服用鎮靜劑平伏焦慮情緒。
記者：陳沛冰
精神科專科醫生歐陽國樑表示，去旅行、考試、見工、返新工，甚至換新老闆都會令人壓力增加，導致身體出現不適症狀，「好多人一有壓力就會周身唔舒服，睇咗好多醫生都唔好番，甚至做好多檢查都解釋唔到點解有病徵」，又或有關症狀是每當某一件事情發生才出現，「好似次次去旅行先會有，但身體唔會識揀次次出門先病」，這便是可能與壓力有關的症狀。
歐陽國樑表示，去旅行也可令人焦慮，「老人家平時少出門，仲要佢搭飛機，症狀會好明顯，有啲人未必一定驚旅行會發生預計唔到嘅事，但就擔心途中唔舒服無醫生睇，已經可以好驚」。他指，曾有病人一直工作都無問題，但換了新老細因為覺得好焦慮便生病」，他說香港人本身已「拉得好行」，再加多少少壓力已經可以病發。
焦慮可引致肚痛、肚屙、胃痛、心跳加速、手震等症狀，甚至「周身都有問題，但又可以行得走得，食得飯又唔使入醫院」。歐陽國樑稱，診斷是因焦慮或壓力引致身體問題可服用鎮靜劑，如每次旅行才出現焦慮症狀，可於旅行前或旅行期間有需要時服用，長遠要從思想行為入手，學習克服恐懼。但有病人日常生活也有焦慮症狀，「好多人平時都好焦慮，平時都有症狀但忍得住，去旅行先出現症狀」，或需同時服用抗抑鬱藥。