天星小輪公司用超過1,400萬元將舊小輪「世星」翻新，同另一艘小輪「輝星」提供維港遊，並計劃本月底至12月初開辦來往尖沙嘴至大嶼山迪士尼樂園航線。
小輪公司總經理梁德興話，到時每日都會有班次來回迪士尼，早船由尖沙嘴天星碼頭出發、黃昏回程，船程約45分鐘，途經貨櫃碼頭同青馬大橋等地標，希望吸引更多外國遊客遊船河。但遊客必須購買來回套票，票價約180蚊，包船上小食。
梁預計每日有超過350人次乘搭「世星」，期望6年內回本。又話目前乘搭「輝星」維港遊嘅內地和外國遊客各佔一半，但「世星」定位將以外國遊客為主，「佢哋比較鍾意睇中流作業、貨櫃碼頭呢啲景」。
而「世星」夜晚會帶遊客睇ICC嘅幻彩表演同幻彩詠香江，票價約200蚊，並提供包船服務，可以搞婚禮或包船去長洲等。