「青山出嚟」、「返青山」，大家可能細細個已經聽過有人咁講，講緊嘅「青山」，就係位於屯門嘅青山醫院。青山醫院是香港第一所主治精神科的專科醫院，亦因為咁，出現咗笑人「青山出嚟」呢種帶有歧視色彩，話人有精神病、黐線嘅俗語。
歧視與偏見，通常都源於不瞭解，青山醫院一直帶有神秘色彩，好多人想像入面係電影所見到嘅瘋人院。究竟裏面係點？大家嚟緊就有機會親身去睇清楚。每五年一度的青山醫院開放日將於下月舉行，屆時青山醫院將免費向公眾開放，毋須入場票。
開放日活動包括導覽參觀、攤位遊戲、講座及非洲鼓、民族舞、即興劇等等表演活動。參觀者可以自行遊覽，或於導覽人員的帶領下參觀醫院開放的區域，包括懷舊閣（老人精神科懷舊治療）、病人日間訓練中心、治療中心、模擬社區服康訓練、歷史文物館、藝術工作室等等，更可一睹半世紀前精神科的治療工具。狗醫生到時亦會在場陪伴各位大人小朋友。
青山醫院於1961年啟用，至今走過五十五個年頭。其實，現今香港很多醫院都有精神專科，而青山醫院所服務的病人亦包括酗酒、老人精神科、物質濫用服務等等，並唔係「黐線」，大家唔好再誤解同歧視「青山」喇。
青山醫院五十五周年開放日簡介
日期：2016年12月3日（星期六）
時間：上午10時至下午4時
地點：新界屯門青松觀路15號青山醫院
記者：李珮禎
