消委會出版、教市民精明消費嘅《選擇》月刊今年40歲嘞，最新第481期主打測試各大品牌保濕日霜，發現貴一貴嘅專櫃品牌，唔一定輸畀百零二百蚊嘅牌子，獲唔少女士畀like，呢期仲特別搵嚟極精靈嘅鄭裕玲做封面人物，Do姐仲攞住那些年以佢為封面嘅《選擇》月刊擺po留影，祝《選擇》生日快樂兼繼續努力。
消委會仲趁機印製咗本《健康手扎—從內至外的生活提要》，結集近年美容、飲食同BB產品嘅研究心得，畀大家重溫。消委會總幹事黃鳳嫻話，《選擇》一直都與時並進，由初時黑白雜誌發展到𠵱家要拍埋片，感謝同事嘅努力同市民支持，佢話《選擇》嘅網上同流動版做得未夠好，為咗更便利網上讀者，希望明年可以同政府申請撥款改善，令《選擇》更上一層樓。