VR（虛擬實境）同AR（擴增實景）大行其道，如果將VR加埋AR，會變咗乜東東？咪叫MR（混合實境）囉！九龍灣MegaBox同海洋公園合作，聖誕將商場變成超時空魔幻城（圖），喺美國引入HoloLens眼鏡，全港首次公開畀人玩。
呢個HoloLens融合5個攝影機鏡頭、一個深度感測器、一個運動感測器等，同埋有一對3D音效喇叭。眼鏡採取光學透鏡，脫離以往VR技術嘅封閉式，令玩家有如置身喺現場實境同虛擬影像，仲可以同虛擬物體進行互動，完全係一副超級電腦，賣價講緊3萬幾蚊。
八方試玩過，望住現場聖誕樹實境，點知啲樹飄咗啲虛擬聖誕波出嚟，伸手將啲波篤爆，會變咗聖誕鹿走過嚟想咀嘴，好盞鬼。市民本月19日起，指定日子消費滿100蚊就有得玩嘞。