當5年前唔少勞工界包括工聯會內唔少人，都俾梁振英花言巧語𠱁到暈陀陀時，工聯會榮譽會長陳婉嫻已經好有智慧以「只講不實際」嚟評論梁振英。
話說5年前今日，嫻E剛再當選區議員。佢同傳媒茶敍時係咁樣評價唐梁嘅，佢讚唐唐雖然唔熟書，但都算係一個有心人，而梁呢，嫻姐話「只講不實際，要有具體的，才能信任你」。怕且當時冇乜幾多人聽得明嫻姐嘅苦口婆心！因為當時大家覺得唐唐親商界，梁就係基層救星，但結果梁做到特首又點？取消強積金對沖、標時、勞假同銀行假睇齊等，有邊樣做到呢？
至於5年前今日嘅梁，喺一個活動後好義正詞嚴咁話，「特首選舉由中央欽點」呢個講法，「真係侮辱咗1,200名選委，簡直係陷中央於不義」。梗係陷中央於不義啦，因為唔係中央欽點，係西環欽點吖嘛。