嗰日聽到689回應釋法嘅時候，竟然話「20年先釋咗5次法」，我當堂嚇一跳，唔係為咗佢嘅無恥同邏輯謬誤而有反應——你預咗公廁就一定係臭㗎啦——而係，佢呢個理由，竟然完全同嗰個星期嘅《頭條新聞》嘅橋段一模一樣﹗
我哋嗰集話，20年先釋法5次，計埋4年先一次，你估世界盃咩？中央已經好忍手㗎啦。
政府同我哋撞橋撞到啪啪聲，真係唔知佢向我哋致敬，定我哋係事前抄襲佢事後啦。
呢個都唔係最嬲，堅嬲嘅係，原來政府嘅公關稿、或者乜鬼line to take，原來可以咁hea咁搞笑，咁我年中度唔少無無謂謂嘅反諷gag，你不如向我哋團隊出價購買，幫補吓家計啦。
譬如嗰個反釋法、撐港獨嘅集會……噢sorry，係反港獨撐釋法，無計，臨時收柯打，唔係好記得啲字句點樣講順口啲。呢個其實唔係政治集會，係萬人招聘大會，各地打工仔同群眾……演員，濟濟一堂，不論是江門蛇口定係東莞淡水，總之個個抱住「人傻錢多快來」心態出現。記者突擊檢查集會群眾演員，考佢哋對釋法嘅睇法，結果梗係唔識答啦。
呢樣嘢，如果交俾我去解畫，真係好容易。你諗吓，橫店嘅群眾演員，會唔會知道自己要拍嗰套戲嘅故事大綱人物性格關係同埋最後結局係點㗎？茄喱啡淨係負責行行企企，劇本大綱嗰啲，係主角先會知㗎嘛。群眾演員只有肉體沒有靈魂是常識吧！
嗰日啲主角咪上晒台嗌咪講台詞囉，女主角仲大大聲話支持中華民國㖭……做乜啫，講錯對白NG好出奇啊！
不過，如果各位群眾演員係做戲，你可唔可以大方啲同觀眾講聲「鏡頭喺呢度啊」，你唔好以為觀眾同你哋係同類先得㗎，我哋有用腦㗎。