香港唔少銀行家陣都有視像櫃員機（VTM），呢個熱潮連保險公司都玩埋一份，噚日友邦引入首部「真人視像理賠機」，可以即時處理個人醫療保單，甚至提出索償申請。
呢部機暫時只係設喺友邦位於尖沙咀嘅Premier Medical Care Provider，未來會逐步喺醫療中心同私家醫院鋪設，用呢部機嘅好處係，投保人可以「免找數」使用部份醫護安排，唔一定找完數先再claim，方便好多投保人。
至於未來會唔會出現「真人視像投保機」，即係隔住個「芒」就可以同代理買保單，友邦香港及澳門業務策略及市場策劃總經理謝佩蘭（Bonnie）話，壽險係一個人與人接觸嘅行業，隔住個「芒」投保差好遠，暫時未有此計劃喎。