港股連同幾個亞太區及南美股市跌極唔停，完全同歐、美、日股以至A股升勢成為兩個平行時空，反映呢場港股跌浪絕對唔係恐慌性拋售，但基金要不問價沽貨同追貨換馬，亦睇得出強弱勢股改朝換代係嚟得幾咁急同埋廣泛性。唔好以為呢場換馬只係虛火，因為呢個世界唔會所有聰明人一齊犯下同一樣嘅錯誤，只會全世界聰明人他朝向後知後覺嘅人證明自己做嘅嘢係啱。
策略唔複雜，係冷靜地持有呢場資金大挪移嘅贏家，滙控（005）、江銅（358）以至一眾貴金屬股，佈局好鮮明。反之，散戶衝入去撈嘅騰訊（700），近期罕有地跑輸大市，由高位下跌13%唔夠，大家已經鬼殺咁嘈。
睇騰訊，豐功偉績、增長前景呢啲咸豐年原因已經係廢話，或許睇一樣嘢會更實在，就係個圖。騰訊由8月中延伸至今嘅技術形態，可以話係頭肩頂、可以話係圓頂、可以話係島形頂，總之係極典型嘅見頂形態。周一裂口低開出現大陰燭，呢個係突破性裂口定消耗性裂口？一半半，可以肯定嘅係，上市到𠵱家都未曾試過嘅長線轉弱形態已經出現，依圖直說，按量度跌幅見180蚊？呢個或許係最保守估計，結果有可能衰到大家估唔到，這個不是我說，是圖表說。
騰訊要出動到散戶血肉長城去頂，亦不是好事，即係話畀你聽，唔使做任何後抽、反彈，都能夠有位畀大戶沽貨，咁先大鑊。嚟緊星期三就係季度業績，績前或許有個反彈機會，博你信佢業績有得炒，引散戶入局，到時掉番轉係逃生機會。至少，趁騰訊反彈換馬去買強勢股，都唔會蝕章。
基本因素方面，從結果推斷返個原因出嚟的話，令騰訊急轉直下嘅原因有可能係－－網絡戰。
晉佳
http://fb.com/advanceguy1