特首跑馬仔就快開鑼，其中一匹大熱fit馬財政司司長曾俊華，繼續四圍出席活動social，噚晚就去咗獅子山學會周年晚宴做主講嘉賓，題目係自由經濟，絕對開正佢最擅長嗰瓣。
講自由經濟似講政綱
晚宴以「Celebrate the legacy of positive non-interventionism」為主題，作為積極不干預政策嘅旗手，薯片叔叔一嚟就數白欖咁講自己政績，話香港連續多年獲國際機構評為最自由同最具競爭力經濟體，仲話呢啲係香港賴以成功嘅原因。
佢仲話，香港受惠於經濟全球化，係全世界最大的自由經濟體，要保持呢種優勢，全靠有法治、司法獨立同埋廉潔等因素，相信自己同在場人士都唔會破壞呢些價值咁喎，十足宣佈參選政綱咁。
但直到離場，薯片叔叔都冇回應有關幾時會參選嘅提問。有位行家追問佢係咪未獲得中央信任，行到一半嘅佢忽然轉頭回眸一笑，好似要認住發問嘅記者咁，然後施施然走入電梯鬆人，唔通都係天機？