同投資L吃壽司談古典音樂，左丁山似係幼稚園學生同大學生傾偈，得個聽字，於是變成佢問我政治，我問佢音樂，啲壽司零舍容易入肚，乜都食晒。食完甜品先至驚覺自己出門前為免浪費，已經吃過雞尾包、餐蛋治與香蕉，食量未免太大，與投資A坐的士返回大道中渣打總行門外落車後，立即搵路行，由皇九上天橋行到信德中心再去永安，然後行返萬宜大廈對面買馬經，三點幾先至返回寫字樓。
左丁山自幼居住環境狹窄，想話學劍擊，老竇話無謂想創個心，屋企冇餘錢幫你買套衫（對劍擊有興趣係因為睇史超域格蘭加嗰套戲──美人如玉劍如虹──而起，還有愛路扶連啲劍俠片），學鋼琴小提琴，當年更係貴族玩意；學唱歌，自己入讀嗰間私立中學就無音樂課程，根本冇機會。好彩還有機會聽原子粒收音機，香港電台有陳浩才老師嘅「醉人音樂」節目。聽得多，因自己記性好，講番出嚟可以嚇吓人，以為我對古典音樂有研究㖭。及至出來中環打滾先至發覺，在某些場合與適當場合，要識得如何投入高級人士的「有教養談話」，例如講吓貝多芬莫札特，提幾句莫奈梵高，知道To be or not to be是甚麼，以至到卡拉揚與蘇提之分別，瑪歌芳婷係邊位先至唔會俾人睇小，視你為「有啲文化」，可以做慈善波嘅嘉賓對象。反而極少人講中國歷史、文學，西洋文學哲學都冇乜人有興趣或有充份知識去講。
上述種種，在大學中小學全部冇教過，全靠課外閱讀，逼自己養成「周身癮」，睇報紙連李歐梵、Oliver Chou嘅樂評都讀埋，學習學習，輸在起跑線唔緊要，總之要沿途力追，不致於落後大隊。
嗰日由信德中心行番轉頭之時，到咗無限極大廈，竟然碰到外匯C，佢捉住左丁山就問：「星期四凌晨曼聯作客費倫巴治，你買邊隊？」哦，由精緻文化立即跌落凡俗賭波，左丁山諗咗5秒，就話上次兩隊作賽曼聯贏四比一，今次都係買番曼聯啦，外匯C話：「多謝提點，咁我去落注主勝。」左丁山為之愕然，星期四早上起來睇BBC網頁，果然就係曼聯輸咗二比一，教練摩連奴話曼聯呢場似打夏季友誼賽，對手就似係踢緊歐聯決賽贏得合理，咁都有嘅，賭波真係難，打電話問外匯C贏咗幾多，佢笑到好大聲，話贏咗幾皮嘢，下次食飯係佢嘅。再問佢點解要買費倫巴治，佢嘅答案激死人：「朋友之中，你最有通識，又有理性分析，係我地盲公竹，呢個世界有好多非理性之事，同你對着幹有着數！」