【本報訊】一輛私家車前日在西營盤違例掉頭被警員抄牌，車上夫婦疑不忿硬食牛肉乾大動肝火，火爆女乘客不斷指罵警員「死佬、黐線㗎！」，又揮動長傘，惹來圍觀市民替警察幫口。有關抄牌片段昨在網絡瘋傳，原來涉事夫婦是《新報》前社長馮兆榮及其太太。
記者：梁瑞帆
該段約3分鐘長的片段昨在網上廣傳，網民紛紛大讚罵不還口的警員EQ高，封他為「冷靜Sir」，形容他行為「不慍不火」，「真係要畀個like個警員」，亦有網民指該對夫婦的反應是潑婦罵街。
大鬧食屎、死佬、黐線
事件中的高級警員姓張，綽號叫「獅子」，隸屬港島交通部執行及管制組，加入警隊28年。而車上夫婦是《新報》前社長馮兆榮及其妻子。事緣前日下午4時許，馮駕駛一輛其名下的銀色豐田私家車，載着妻子沿德輔道西東行，駛至近威利麻街前突然掉頭到西行線，結果被警員截停並發出違例告票。
片段甫開始可見馮太坐在前座乘客位，因不忿被抄牌指罵警員，卻招來女途人圍觀斥責，她一度由車廂伸出雨傘作勢嚇退對方，並罵道：「識咩呀？食屎，八婆！」而抄牌的警員並沒有動怒，還勸途人冷靜，「唔好同佢嘈，我都唔出聲」。惟有人再將矛頭指向警員，連珠炮發並叉腰罵道：「抄你就快快趣趣，抄幾耐呀？寫嗰幾個字，寫半個鐘！……你都黐線，發癲！食屎啦，抄牌使唔使咁抄？浪費納稅人啲錢！」並質問警員：「你幾錢一個月呀？死佬！」
馮其後步出車廂，並力斥警方不是：「唔係唔肯畀錢，趕時間嘛！」馮太則越罵越激動，打開車門站出車外罵道：「捉賊冇咁勤力，抄牌咁叻嘅？捉賊你匿埋一邊呀？死佬！捉賊你唔閃呀？成日捉交通意外……食屎啦你！」她續大罵：「黐線㗎，抄牌抄半個鐘……我要救命呀！我要去瑪麗醫院，死佬！睇你屋企有事點？」說罷一度欲搶去警員手中告票，「攞嚟啦！死佬！」並揚言要向警方投訴；馮亦喝令警員：「擺（告票）喺度啦！」
「抵你成世做差佬」
警員見婦人伸手欲搶告票，終打破沉默：「你冷靜啲，我第一次警告你！」馮太反駁指，「我第二次警告你呀！死佬！」圍觀市民見狀表態願做證支持警員。馮婦其後登車離開時仍罵聲不絕：「抵你成世做差佬，做死一世！」
《蘋果》昨回現場了解，見上址東西行均兩線行車，路中有電車路，路面比較繁忙。有附近海味舖職員稱，事發時警員抄牌只有一陣子，不是半小時之久。