證監會行政總裁（CEO）歐達禮因上市架構改革而變成大魔鬼，認真陰公豬呀！
噚日證券行老闆同業界人士好唔得閒，冇得去嘆茶，要參與「反對上市架構改革」遊行。隊伍由證券商協會蔡思聰（Jojo）、股評人林家亨、細價股專家詹劍崙打頭陣，先去證監會所在嘅長江中心放低請願信，再去交易所，由傳訊部兩名高層代表接信，港交所（388）董事李君豪都有出現，但婉拒回應。
收隊時，遊行負責人馬生話，大會統計有3,700人、集合成1萬封反對請願信。但華華喺現場真係數唔到3,700人，頂多幾百人囉。
遊行當然要有道具喇，由於歐達禮母語係英文，遊行人士好貼心，整咗英文標語：「Ashley Alder must go」，加埋有佢個大頭嘜變成大魔鬼嘅改圖，佢本人應該睇相都明白晒。
不過，歐達禮可能R甩頭髮都唔明白，業界點解會由反上市架構改革，跳到去要求佢下台。有遊行人士指，證監會重要職位應由香港人做番，詹劍崙又質疑，以歐達禮咁強硬嘅人，係咪適合做呢個位。咁大家諗吓喇。