2006年成立嘅公民黨嚟緊星期六舉行周年大會，改選新一屆領導層。據知黨內已經完成提名程序，至今只有梁家傑及楊岳橋分別獲提名主席同黨魁，換言之如無意外會獲選，議會內外拍住上，任內重點工作包括堅貼地，帶住公民黨扎根地區。
特朗普當選有啟示
公民黨呢次換屆選舉，係根據新修訂黨章產生嘅首屆執委會，由佢哋嘅新架構可見，未來兩年工作會更貼地，因為有兩名執委會專責地區工作，據知獲提名嘅係譚文豪同余德寶，皆因佢兩位都有諗頭，相信可以為地區工作帶嚟新方向。
明明卸任黨魁一身輕，卻再擔起主席呢個重擔，袋巾無非係想喺香港危難時，同大家一齊同行，希望公民黨堅持守護核心價值，同時向香港人解釋形勢，爭取同最多港人同步。袋巾話英國脫歐同特朗普當選美國總統，全球出現所謂反精英嘅浪潮，都畀個黨一大啟示，就係作為港人授予公權力嘅政黨，唔可以只與同聲同氣嘅社群對話，仲要明白唔同背景、階層人士嘅想法同需要，「要真正做到雙腳在地，唔好堅離地」；所以會大力拓展地區工作，鞏固忠實票源，減少策略選民嘅比例。
岳少早前接掌黨魁時，都話過希望任內將公民黨由過去市民要「昂高頭」望到、變成「擰轉頭」就見到，相信佢同袋巾一定好合拍。