湖人喺上周六NBA常規賽，憑D羅素（D'Angelo Russell）、卡拉臣（Jordan Clarkson）同L威廉士（Lou Williams）各得超過20分，作客以126:99擊敗塘鵝，將戰績改寫到六勝四負，自2011/12球季以嚟第一次開季頭10場勝率超過50%！
一眉受傷塘鵝好大鑊
雖然湖人名宿拜恩（Kobe Bryant）喺上季後退役，球隊正式踏入後Kobe時代，不過，「紫金兵團」真係唔使擔心後場變弱，因為今場正選嘅D羅素射入22分，後備嘅卡拉臣同L威廉士都有23分同21分。今季俾新帥禾頓（Luke Walton）轉做第六人嘅卡拉臣話：「我同L威廉士打得好進取，要帶領後備陣容繼續得分，呢個亦係教練畀我哋嘅任務。球隊有好多得分點，令我哋嘅陣容有更多變化。」
至於塘鵝主將「一眉」安東尼戴維斯（Anthony Davis）喺第三節打咗3分48秒，就因為上籃後失平衡跌低而受傷離場，雖然佢喺第三節尾段再上陣，仲射入全場最高嘅34分，但都難阻球隊輸波。
「一眉」賽後好無奈咁話：「我嘅背傷不時復發，真係好討厭因為受傷而打唔到波。」
