美國共和黨特朗普當選總統，凳都未坐過就開始「微調」競選時嘅主張。好出奇咩？八方同大家回帶至5年前今日，備戰特首嘅梁振英就住曾經話，香港唔應該用高地價高租金去維持低稅制嘅言論，急急澄清，否認做到特首就會加稅，但就話社會對退稅、人人派6,000元等「派糖」措施有較多爭議，認為政府要研究如何善用豐厚儲備。
5年就咁過咗，CY只係加重社會內耗，冇加到稅，但大家覺得啲公帑，又係咪一如佢所言善用咗？大大小小、不計其數嘅大白象工程，以及日薪一萬請新聞統籌專員馮煒光，條數又點計先？
當年今日，梁振英出席一個選委論壇時，亦自誇係佢喺2003年去北京促成自由行，不過當日有記者一問到，佢點樣處理自由行炒貴晒香港啲樓同舖租？佢就拒絕回應。