臨近年尾，好多朋友結婚擺酒，金融界亦有喜訊。摩通地產分析員梁啟棠（Cusson）上星期五「光棍節」結婚，老婆係佢喺瑞信工作時認識嘅Joyce Kwok，兩人當年一齊睇地產股寫研究報告，寫到簽紙結婚。
Cusson睇地產股大大話話有廿年咁耐，為人隨和，即使喺外資大行做，都唔會牙擦擦。Joyce Kwok喺2008年加入瑞信，跟住Cusson一齊睇地產股。
Cusson強調，佢2013年轉去摩通之後，先至同Joyce拍拖㗎，Joyce一年前亦轉咗去美林做股票sales（最近做緊少奶）。兩人上周五喺中環四季酒店擺酒，筵開29席，聽講唔少地產商嘅管理層都有到賀。
咪以為呢對新人接住放大假去honeymoon，佢兩位今日已經照常返工，事關Cusson要趕工寫2017年地產股前景報告，跟手做埋marketing工作，要等到年底先可以去honeymoon喇。