前星期，投資A失驚無神來短訊約食午飯，點知佢揀嘅日子，左丁山日日都唔得，幾唔好意思，但當日適逢星期三賽馬日，左丁山買定雞尾包與餐蛋三文治，預備中午一邊食一邊刨馬，於是諗住揀日不如撞日，問投資L當日吃飯得唔得？佢話：「我剛自台北回來，今日冇約人，驚冇可能約到你今日見面啫。」於是一拍即合，佢話臨急臨忙，怕中環訂唔到位，於是約咗去銅鑼灣耀華街Zing!五樓食壽司。
左丁山去到，先知呢間日本料理叫做「樂壽司」（Kishoku），投資L似乎相當熟絡，坐在壽司counter，師傅整乜就食乜，唔駛點菜，於是大家食個不亦樂乎，投資A問及特首選舉最新情況及對股市樓市影響，因目前大勢未明，只有一位胡官宣布參選，胡官公開否認係聽咗夏佳理嘅意見先至參選，無人知道佢是否有後台撐腰，講乜都係傳聞而已。聽講胡官已有選舉辦事處，設於威靈頓街六基大廈一樓，以前嚴浩公司嘅寫字樓，至於嚴浩就搬咗上六基十樓以前馬主H嘅辦公室。
講選舉，15分鐘就講完，問投資L去台北做乜？投資L話唔係公幹，而係去聽偶像音樂會啫，先去澳門聽咗一場，再飛去台北聽埋日場夜場，連聽三場，過足癮。邊位大師有咁嘅吸引力呀？聽投資L講番，乃係俄羅斯著名指揮家Valery Gergiev（台灣譯做葛濟夫）指揮Mariinsky Theatre Orchestra在台北國家音樂廳嘅演奏會，於10月30日分中午場（下午2時）及晚場，連聽兩場共五小時，聽衆都坐到屁股痛，指揮家及管弦樂團團員嘅精神體力付出，可想而知。中午場演奏俄國樂曲，柴可夫斯基C小調第五號交響曲與蕭斯塔科維奇之降E大調一號大提琴演奏曲。投資L話葛濟夫對俄國音樂極度熟悉，指揮可以唔睇樂譜，一切操控自如。到了晚上7點半，就演奏華格納不朽歌劇──「前夕：萊茵的黃金」全版Der Ring des Nibelungen - Das Rheingold (Opera in Concert)，係極具挑戰性嘅演奏，足以令管弦樂團精疲力倦，但晚上十點半葛濟夫居然在謝幕後宣佈可以為聽眾簽名，於是投資L撲出去排長龍攞簽名，對葛濟夫之體力及精神佩服到不得了。63歲咯喎！呢位大師去完澳門就去台北，之前又去北京、哈爾濱巡迴演出，點解唔嚟香港呢？一講，投資L就大駡香港冇鬼用，搞西九文化區15年不成，文化中心好難有檔期，連澳門都不如，逼佢呢啲發燒友要撲去澳門台北聽音樂！