【本報訊】以手撕雞腸粉馳名大圍的「華輝小食」，前晚因一個紙皮箱擺出街遭食環署票控阻街，53歲女店東不滿拒絕出示身份證，擾攘半小時後，最終被多名警員按地制服及鎖上手銬帶署，事主暫准保釋。其子表示，對母親遭到粗暴拘捕感痛心，「好恐怖，食環署好似大陸城管咁，媽媽犯咗乜事，點解要好似暴徒咁拉佢？」
記者：文兆麟
女店東溫太（53歲），涉嫌阻礙公職人員執行職務、阻礙警務人員執行職務、在公眾地方造成阻礙及未能出示身份證明文件被捕，現准保釋候查。
兒子溫先生表示，事件對母親造成巨大的心理陰影，離開警署時仍渾身顫抖，「當我睇到網上片段，媽媽俾警察㩒喺地下，真係好心痛！」他指現階段母親或需休息一段日子，暫時不會看舖。
溫解釋，事發時他不在店舖，據他所知，前日傍晚有一個來歷不明的紙皮箱放在店舖對開的行人路，食環署人員巡至即時票控母親阻街，其母已解釋該紙皮箱並非她所有，不滿食環署「生安白造」，最終因情緒激動，被警員按在地上及扣上手銬。
附近商舖抱不平
他指問題是食環署在未查清楚紙皮箱誰屬下，即武斷票控，加上無口頭警告，令人難受，覺得不近人情，其店舖開業兩年，從來奉公守法，沒被檢控過，「如果我哋成日非法阻街，被票控心甘命抵，但係為咗一個不明不白嘅紙皮箱搞成咁，好過份。」
此外，華輝小食昨晨如常營業，附近散貨場負責人伍先生亦替華輝抱不平，指小食店簷篷底屬於富嘉花園私人地方，容許店舖擺放貨物，簷篷對出是行人路，當時有人送來一批紙皮箱，放在簷篷底，其中一個擺出行人路約一呎，女店東及店員因忙於做生意，未有注意紙皮箱擺出界。
「唔應該一嚟到就票控，法律不外乎人情！」伍認為食環署過份，應該先行警告，貨主倘肯改善就應相安無事，「搞到用手銬鎖老闆娘，冇咁嘅必要。」他稱事件因有太多人圍觀，殃及附近幾間店舖，其散貨場也損失幾千元。
華輝小食開業兩年，初時主要售賣魚蛋和燒賣等小食，後來推出手撕雞，其中手撕雞腸粉大受歡迎，日賣約500份。
