愛美女士為咗靚靚着高踭鞋，就要捱得住行路比較辛苦；女人之苦，又何止着高踭鞋咁簡單？
香港遺傳性乳癌家族資料庫噚日喺赤柱大街舉行「粉紅5公里慈善跑」暨「粉紅高踭鞋慈善賽」，其中參加慈善賽嘅選手，要着住唔高於兩吋踭同有粉紅色裝飾嘅高踭鞋喺大街上競跑。
唔少男士都踴躍參加，服飾仲好鬼pinky，雖則着住高踭鞋競跑，活動唔多自然兼左搖右擺，但佢哋都全情投入，無非係透過活動，提高公眾對遺傳性乳癌、卵巢癌同前列腺癌嘅關注同認識。活動籌得款項，會用嚟資助本地經濟有困難嘅高危家庭做BRCA基因突變測試及輔導工作。