中環在線：
胡文新千萬開Live Music餐廳 - 李華華

合和（054）太子爺胡文新（Thomas）都幾多諗頭，並非只諗買地、賣樓，早年佢喺港推廣冰球，兩年前佢喺自己地頭九展開戲院，兩個月前又喺主場灣仔合和中心開live music餐廳「1563'」，認真估佢唔到。
聽講，Thomas早於3年前就想喺合和中心開間Live Music餐廳，一來香港好少呢類餐廳，佢覺得有市場，二來可以配合利東街發展，希望帶旺晚上人流。
直到舊年，佢知道音樂人馮穎琪（1996年創作鄭秀文《放不低》而出道）喺中環開嘅Backstage Live Restaurant不敵業主加租而結業，Thomas就搵對方合作，邀請對方做新餐廳嘅音樂總監，只負責live music部份，雙方一拍即合。
咁啱合和中心6樓一間酒樓租約期滿，Thomas就收番呢個6,000呎舖位，投資1,000萬元，重新設計同裝修為地方闊落嘅live music餐廳，基本上每晚都有歌聽，遇上有名氣嘅音樂人表演，餐廳會額外收費。
日頭，呢度係普通餐廳，午餐人均消費大約100蚊，由於呢度地方闊落，幾面落地玻璃，感覺開揚，喺度食晏傾偈幾舒服。聞說，Thomas周不時約人去呢度食晏㗎。