家陣興玩「假人挑戰」，自以為係「潮流教主」嘅葡萄牙及皇馬球星基斯坦奴朗拿度（C朗）當然都有玩埋一份，但淨係着條底褲企喺度擺甫士騷胸肌同埋腹肌，好鬼自戀囉！
「假人挑戰」風靡全球，呢股熱潮仲殺到入球壇。日前C朗就同佢班葡萄牙國家隊隊友喺更衣室扮假人，有啲扮睇手機，有啲扮傾偈，而C朗就淨係着住一條佢自家品牌嘅白色底褲，企喺度擺出招牌式甫士騷肌肉。之前有傳呢位31歲皇馬球星打Botox，打到塊面都膠埋，所以扮假人真係一啲都難佢唔到囉。佢玩扮假人之餘，仲不忘幫自己品牌CR7賣廣告，兼且騷一騷佢好引以自豪嘅body，真係冇人夠佢玩。
戴眼鏡續約惹是非
另外，C朗上周同皇馬續約嗰陣無啦啦戴咗一副黑框眼鏡，事後俾人篤爆副眼鏡係佢贊助商「一剔」嘅產品，但皇馬嘅贊助商「三間」對C朗喺續約儀式上，以植入式方法幫一剔賣廣告非常不滿，聽講仲有可能罰佢錢㖭。雖然C朗成日有好多蠱惑嘢同騎呢嘢，但係場外就愛心爆棚，日前仲送咗件簽名球衣畀同癌症戰鬥緊嘅博維斯塔19歲球員伊度費拉拿。
