網絡新聞成為大勢趨，《蘋果日報》為咗有更多資源裝備自己，繼續將新聞做好，早前公佈本月14日起調整售價，由港幣$7加至$8，而這$1並無嚇走讀者！
有讀者話$8並唔算貴，將會繼續購買，因為睇《蘋果》已經成為習慣，好似錢先生就話：「我每日一定要睇《蘋果》！」睇咗《蘋果》十幾廿年嘅讀者何先生都笑住咁話：「啱我胃口吖嘛！」
講到內容方面，讀者麥先生話欣賞《蘋果》報道事實，體育、副刊同社評都相當受讀者歡迎。有讀者讚《蘋果》好關心政治，令社會有多種聲音，黎先生話：「唔使成個社會偏埋一邊！」
此外，讀者錢先生欣賞《蘋果》有愛心同人性，例如發生突發意外，有設立「蘋果日報慈善基金」，呼籲讀者捐錢幫助有需要嘅家屬，係好有意義嘅事。
記者：鄒倩婷（阿仙）
攝影：廖達燊
剪接：Roy
編審：陳家文