28歲愛爾蘭「寸嘴格鬥王」麥基格上周六喺紐約嘅UFC 205輕量級賽事一拳打爆32歲嘅美國選手艾華利斯，成功成為UFC史上第一位同時贏到兩個級別嘅拳手！
麥基格嘅打法出名囂張，喺第二回合試過將雙手放喺背後，似乎寸到話自己讓雙臂都贏；而佢之後出手就重拳打到艾華利斯爆晒缸，只係用咗3分04秒就T.K.O.。其實麥基格玩開135至145磅嘅羽量級，之前就增磅到次中量級同迪亞斯打咗兩場，今次就減番少少鬥145至155磅嘅輕量級；今次佢成為UFC史上第一位同時贏到兩個級別嘅拳手，的確係寸得起。30歲嘅女拳手泰迪喺同日另一場嘅女子雛量級輸畀28歲嘅佩寧頓之後，突然喺場上宣佈退役：「我決定退役喇，多謝大家咁多年嚟嘅支持，我仲好鍾意呢項運動，但我覺得自己係時候退落嚟。」