上電視教中文嘅中大講師Ben Sir（歐陽偉豪）人氣高企，下個月仲獲邀舉行慈善talk騷。最近佢喺facebook出post寸釋法變修法，網民勁like，現實世界嘅Ben Sir其實對最近政治新聞不忍卒睹，亦慨嘆𠵱家年輕人好多嘢都冇得揀，「今時今日你冇得揀做人定唔做人，釋法定唔釋法囉」。
不過佢預告個talk騷會少講現實有幾殘酷，「唔好講到咁真囉，如果唔係個個呆晒喺度㗎啦，好悲㗎」。八方明嘅，現實咁多是是非非，唔知Ben Sir會唔會搵埋大台班「是非精」，嘻嘻哈哈中和番呢？
勁like特朗普譯做「侵」
唔只寸釋法，Ben Sir其實好緊貼網上熱話，佢特別欣賞網民繙譯特朗普做「侵」，「有音譯、有埋意譯，侵略晒好多人嘅美夢，娘要嫁人，天要下雨，侵要做總統，法要去釋，有乜法子箒？」佢都明白時下年輕人有幾灰，「你有晉升機會，但啲人工低落到係頂多買多部電話獎勵自己，你買樓、結婚生仔好難去諗」。不過佢勉勵年輕人要堅毅，即使𠵱家條路未必係想像中咁理想，但只要努力經營，第時都可以跨界別發展，佢就係例子。
百仁基金請咗Ben Sir下個月19號同精英運動員喺旺角麥花臣場館開talk騷，向中學生分享自身經歷，門票免費，派發方式稍後網上公佈。
李八方
mailto:[email protected]