民記「元秋」蔣麗芸早前立法會宣誓就職時搞搞新意思，用普通話宣誓，事後仲喺facebook出post認叻，話自己原本打算用粵語發言，最後決定以中國官方語言普通話宣誓，不過發音仍未達標，依家就畀長洲「覆核王」郭卓堅拎住佢發音唔正提司法覆核，點知元秋竟然學小學雞網民咁，低調改post，以為咁就代表冇發生過！
話說元秋原本個post寫明，「雖然練習了多次，看來發音仍未達標，請大家賜教」，原來佢係宣誓後兩日、即係建制派開始鬧香港眾志羅冠聰讀歪音宣誓，就低調地將原本個post改咗，將承認自己普通話「未達標」內容刪去，變成「因為很多朋友認同我的普通話說得很好，在這莊嚴場合值得用普通話宣誓」！有人質疑元秋係咪知咁寫會瀨野，所以先偷偷地改咗嗰幾句文，以為可以當冇寫過。
不過元秋似乎唔知facebook有樣嘢叫「編輯紀錄」，只要㩒一個掣，就睇到元秋於10月15日編緝咗原先個post，將佢改post行為現形！八方問元秋為乜無端端要改post？佢就話自己當初喺facebook咁講，完全係出於「謙虛」，後來有朋友話佢咁寫法，可能會畀人話佢連宣誓都講錯，所以就決定事後改post，仲講笑話以後都係唔好咁謙虛嘞！之後元秋又自爆，佢的繼母係台灣人，都有讚佢普通話宣誓講得好好喎！