世盃外歐洲區A組榜首之戰，法國喺上周五主場迎戰瑞典贏得驚險，先失守下靠保羅普巴同皮耶各入一球反勝2:1，三勝一和排榜首。呢場波亦好接近法國恐怖襲擊一周年日子，兩隊喺賽前先進行默哀悼念。
一年前嘅今日法國發生恐襲，造成130人死亡。法國足總主席賀蘭迪都有到場觀戰，話永遠唔會忘記呢次慘劇。場波踢到下半場九分鐘，瑞典由中場科斯貝治射入罰球先開紀錄，不過三分鐘後法國就由普巴扳平，到65分鐘法國由另一英超兵韋斯咸中場皮耶（圖），門前執雞補射成2:1，為法國全取三分。
迪甘斯冇諗過普巴入波
賽前兩隊喺A組同樣兩勝一和，連得失球數字都一樣，法國贏波後暫時喺榜首微微領先。普巴近排腳風順，喺曼聯入靚波後再為法國建功，但教練迪甘斯賽後反而話冇期望佢入波喎：「我知佢鍾意入波，但我唔期望隊波係靠佢嚟爭取入球，佢同中場拍檔馬度迪好好合作，發揮出威力，對法國隊先係最重要。」